_p.png)
2019 كانت سنة مليانة احداث مهمة و من اهمها هي موجة الهيب هوب الجديدة الكانت زى عاصفة لمشهد الراب المصري. سواء كنت بتسمع هيب هوب أو لا ، قصة مروان موسى ، 24 سنة ، واحد من أبرز الأسماء في مزيكا الهيب هوب المصرية ، هي قصة جديرة بالرواية. بعد ما درس حاجة مكنتش من اهتمامه، أدرك أن شغفه هو انه يعمل مزيكا.
مسيرة مروان في المزيكا بتجسد أهمية انك تكون نفسك مش حد تاني ، بتقول ان الإبداع صوته أعلى من التكبر ، والمثابرة في العمل و انك تشتغل علي نفسك لحد ما توصل. بعد ما درس برا ، رفض انه يتخلي عن حبه لمصر. بدلاً ما يندمج في ثقافة مش ثقافته ، قرر أن يكون المحرك لنوع جديد من المزيكا تكون اصوله مصرية ، وكلماته وأغانيه بتعكس بوضوح حبه العميق لمصر وللثقافة و شغفه انه يخليها مكان افضل.
أكثر من أي حاجة تانية، قوة شخصيته اللي بتبان في كل حاجة بيعملها هي السبب الحقيقي ان مروان هو فناننا المميز الشهرده.
انت طلعت تراكات كتيرة في ال 3 سنين اللي فاتوا, حاسس ان شغلك اتغير و اتطور اد ايه في ال3 سنين دول؟
زمان كانت كل الاغاني الي هو الاغنية العادية بتاعة الراب, الي هو انا جامد وانت لا. بس بقيت بحس اكتر ان الواحد لما بيعمل اغنية حقيقة بتتكلم عن حاجة حقيقية, حاجة انسانية, بحس ان الناس بتستقبل الاغنية بشكل احسن او بيفهموها و بتوصلهم.
الكلمات اتغيرت كتير، بس انا ملاحظ ان دا تغيير عام مش عندي بس، دلوقتي طريقة الكتابة اتغيرت عن ما بدأت. مبقتش معتمدة على الورد بلاي بقت اكتر ان الواحد يقول جملة فيها شعر.
على مستوى المزيكا أنا وجيلي حابين فكرة ان احنا نبقى مصريين تاني, مش عايزين نغني راب مش بيمثلنا ولا بيمثل الثقافة المصرية، فا المهرجان موجود في مصر واحنا بنعمل تراب. عاجبنا فكرة ان احنا كبروديوسرز راب حابين نجرب نعمل مهرجانات فبيطلع ميكس جديد, انا حاسس ان هي دي الموجة الجاية و هتبقى حلوة علشان حاجة بتاعتنا احنا.
قولنا شوية عن اغنية البوصلة ضاعت من ناحية الموضوع و المفهوم والكلمات؟
انا في الوقت دا البصلة ضاعت والخلاصة ونهاية العالم التلاتة دول كنت عامل نظام اني هنزل اغنية كل اسبوع بس مكنش عندي اغاني tفا دول انا عملتهم بسرعة فلما بسمعهم بحس انهم بتوع حد تاني و انا مكنتش حاسس بالحالة الي عملتها، بس بعدها بشهرين وانا بسمعها عرفت ان انا كنت في الحالة دي و انا مش عارفها لسة, لان انا كنت في وقت، كان عليا مسئولية و ناس معتمدة عليا فكنت ضاغط كل مشاعري علشان مكنش عندي وقت اواجه دا.
ساعات كتير ببص على الأغاني بتاعتي القديمة و بحس انها مش بتمثلني بس بشوف ناس بتدخل تقولي أن أغنية معينة غيرت حياتهم. الموضوع ده بيحسسني ان مجرد ما الاغنية خرجت مني مبقتش بتاعتي خلاص و بقت بتاعة اي حد يسمعها و يفهمها بطريقته و دي احسن حاجة.
معروف عنك انك بتكتب و بتنتج و بتغني التراكات بتاعتك, ايه الايجابيات و السلبيات للموضوع ده؟
ميزتها اني بقدر ادخلك في عالم من اوله لاخره. فالحاجة الي الناس بتسمعها دي بتاعتي من الاول للاخر. دي حاجة مميزة لان مش كتير الي بيعملوا كدا، عيبها ان الواحد مش بيدي كامل طاقته في نقطة واحدة يعني لو عندي ١٠٠ نقطة طاقة بدل ما اركزهم في حاجتين بس الغنا و الكتابة بوزعهم على كل الاقسام التانية.
انا شغلي اني ابقى بروديوسر و كاتب ومغني، فأنا بقسم شغلي علي كل حاجة من دول, يبقى مليش دعوة بالحاجات التانية، لما بعمل اللحن مش بفكر في الكلمات و لما بكتب الكلمات مش بفكر في التوزيع و لما بغني بركز في اني أدي كل الي عندي.
مين الرابرز الي كنت بتسمعهم و انت بتكبر سواء عربي او انجليزي؟ و هل في حد معين كان ليه تأثير عليك ؟
وانا صغير مكنتش بسمع غير راب امريكاني كنت و مازلت بحب ناس كتير منهم ايمنيم حافظله حاجات كتير و في ناس تانية زي ترافيس سكوت، الي قدر يدخلني اكتر في الغنى.
بعدين بطلت اسمع راب لفترة، بعدها في ٢٠١٣ رجعت اسمع راب تاني، لما رجعت بدات اسمع ابيوسف مع اني كنت رافض اني اسمع راب مصري لأني مكنتش متصور ان حد يعجبني بس لما سمعت ابويوسف عجبني فعلا.
خلينا نحط الراب على جنب شوية, ايه الي خلاك تبدأ تنتج مزيكا؟
كنت بقعد اسمع تراب في الوقت دا ، فانا لما بسمع اغنية كنت دايما بتشد لحاجات غير الغنى زي اللحن. فدخلت اونلاين و دورت ازاي اعرف اني عندي ودن موسيقية. قريت مقال و قررت اني عندي الموهبة دي. نزلت برنامج و بدأت العب عليه. بعدها كان في بنت معايا في الجامعة كانت مهتمة بانها تعمل مزيكا، فاشتغلت معاها لمدة ٦ شهور بتعلم الاساسيات، بعدها حسيت اني خلاص فهمت الموضوع، وفضلت اتطور على مدار الوقت.
هو تقريبا، احسن حل ليا اني اكون شغال مع حد، المزيكا ينفع تتعمل كمجموعة بس بتبقى ابطئ، يمكن تبقى احسن بس جزء كبير من المزيكا زي الكتابة مينفعش تقعد تشارك ناس لازم تعملها لوحدك.
كنت فين قبل ما تبدا تعمل مزيكا؟ وايه الي خلاك تقرر انك تبقى رابر؟
انا اتخرجت من الجامعة وكنت بدرس سينما، دا الوقت اللي بعت لبيوسف مسدج فيه، فهو قابلني، قعدت فترة بشتغل معاه بشوفه كل اسبوع و اتعلمت منه، و حسيت ان الموضوع دا ممكن يحصل منه حاجة. حسيت اني عايز اعمل مزيكا اكتر من السينما، و فكرت ان موضوع انك لما بتعمل الحاجة اللي بتحبها اكيد هتنجح، لانك مبتزهقش منها.
رجعت قعدت الشتا كامل بتفرج على توتريالز و بجرب اعمل بيتس، كنت ببعت البيتات بتاعتي لاصحابي و كانت بتعجبهم و كملت.
المزيكا بالنسبالك ايه؟
وانا بعمل اغنية بحس أني بلعب بلايستيشن الموضوع بالنسبالي بيبقى لغز عايز احله. الواحد بيبدأ بفكرة، مثلا انا مش مبسوط فببدأ افكر فى لحن يعبر عن احساسي و بعدها بشوف كلمات احسها تبقى عن حاجات في دماغي حاجات ليها تيمة مش شرط تبقى مفهومة. انا بفكر في التفاصيل دي اكتر من ما بفكر في اني اوصل احساس. هدفي اني اكون بفكر في العمق دا للحاجة، اوصل احساس للناس من مزيكتي, مشكلتي اني بستمتع اوي بالحاجات التقنية.
شغال على اي البومات او مشروعات دلوقتي؟
انا بعمل اغاني حاليا كفاية انهم يبقوا البوم بس حاسس اني لو هعمل البوم لازم سبب انهم يبقوا البوم، لو عملت البوم ٨ اغاني لازم يبقوا كلهم مربوطيين ببعض علشان يبقى البوم. انا حاسس ان الخطوة الجاية الالبوم ينزل كله مرة واحدة بس لازم سبب يربطه ببعض.
انا شغال في حاجات كتير دلوقتي، معايا ١٠ اغاني بس الي بيحصل معايا دايما ان ٧ من دول مثلا الي ممكن ينزله حاجات منهم ممكن منزلهاش.
نفسك تغير ايه في ثقافة المزيكا المصرية؟
مش بحب في المزيكا الاندجروند, بعيداّعن المهرجانات, ان بيبقى في اعتماد اكبر على الغرب، احنا كدا كدا بنتأثر بس الفكرة ان الناس بتتأثر بالحاجة الموجودة قدامنا السهلة، حتى انا عملت كدا، بس انا شايف انك ممكن تتاثر بمزيكا في مصر ، انت لو سمعت مزيكا مصرية قديمة و اتاثرت بيها هتكون بتبني في العمارة بتاعتنا، دا الي بيحصل في امريكا لما بيزهقوا من الموجود بيرجعوا يشوفوا الشغل القديم و يطوروه مش بيجيبوا حاجات من بلاد تانية.
شايف ان المهرجانات بتقدم ايه للمزيكا بشكل عام؟
المهرجانات جواها ناس بتعمل حاجات شبه البوب، زي اغاني الحب و في حاجات زي الراب انهم يدسوا حد. في ناس متأثرة بحاجات تيكنو او ترانس و في ناس متأثرة بالحاجات الشرقي القديمة، عشان كدا انا بحب المهرجان، لو انت شوفت دور الهيب هوب في امريكا المهرجان بيعمل دا في مصر. هو بس في ناس في مصر بتحس ان المهرجان مش بيخاطبها، بس انا شابف ان دا مجرد مسألة وقت.
المهرجان حاليا مش بيتسمع كنوع مزيكا هو متشاف انه لفئة معينة من الشعب، فا في ناس شايفة ان دي فئة مش بتاعتهم فمش بيسمعوه مع ان المزيكا ملهاش فئة المزيكا لكل الناس.
انا بحب اقارن بين الراب و المهرجان علشان الاتنين طالعين من إمكانيات قليلة، الراب كان فيه نوع سياسي و نوع حفلات بعد كدا بدأ انواع جديدة و فروع مختلفة، بس المهرجان مختلف لأنه نوع مزيكا عملي اكترعشان لازم يبيع، انتشاره بيبقى انه يشتغل في اماكن اكتر.
انما الراب انا لما بعمل اغنية ببقى بخاطب واحد، انما المهرجان لازم يبقى يرقص ناس في الفرح. إنما في نوع مهرجان مختلف بيبقى مهرجان استماع بيبقى بيخاطب ناس اكتر و ليه فروع فنية اكتر، و دا النوع اللي ممكن يوصل للناس اكتر لما تسمعه هيحسوا بالحتة بتاعتة أن المهرجان بيخاطبني زي الراب مش مجرد بيرقص.
سين الراب المصري شهد بيفات كتير في 2019, شايف البيف مهم اد ايه في ثقافة الراب؟
حاجات البيف دي بتخلي الواحد يركز اكتر بس انا مش بحب موضوع البيف دا، دي حاجة اتعملت في ثقافة تانية، بس مش صح ان احنا ناخد كل حاجة من ثقافة تانية، احنا في مصر لما حد بيشتمني بروح اقابله و احل مشكلتي معاه دي ثقافتنا، انا مش شايف ان الموضوع منطقي، هي بتبقى حلوة لما بتتعمل باحترام بتبقى كانها ماتش ملاكمة بتحدد الرابر الجامد مش لازم ننزل لمستوى خناقة شارع، الهدف مش اهانة الي قدامك، الهدف انك تثبت ان خيالك واسع، و رابر اجمد. انت بتحاول تخلي الناس تشوف الي قدامك من ناحية جديدة مش ناحية مهينة بس مختلفة.
شايف ان الي بتغنيه بيرتبط مع مصر ازاي؟
هو مش لازم، انا بغني حاجات بتبقى متعلقة بيا كإنسان من جيل معين عايش قي مصر، بعمل حاجات لناس بتفكر زيي و عايشة زيي في نفس الفترة بتاعتي
Comments